:الواهم
يمكن .. يجوز .. أو محتمل
الشعب ده عـنـده أمــل
إن الزعيم يشبع زعامة
ويسبنا يوم من الملل
يمكن يجوز ..أو محتمل
:النائم
يمكن يجوز .. طب لأ ليه
يحط حصوة فى عنيه
يقول كفاية كدة عليه
وكفاية كده علينا العلل
:الحالم
يمكن يجوز ..شيء مش بعيد
يتولد ما بنا الولــيد
يكسر بسيفه الحديد
كل سيف خشب أتعمل
يمكن يجوز ..أو محتمل
:العالم
شيء لا ممكن..دا مستحيل
من غير شموس هنعيش فى ليل
سيبكوا من الأمل الطويل
بالثورة الميل يتعدل
يمكن يجوز ..أو محتمل
:الفاهم
يمكن يجوز ألف أحتمال
وسباحة فى بحر الخيال
هى البلد عايزة رجال
ولا عايزة رصة قـلل
يمكن يجوز..ومحتمل
