3‏/11‏/2011

زيتي " رسالة إلى جندي مستجد"




قبل ماتخش الكتيبة

قبل ما تسمع سلاحك

قبل ماتدفع ضريبة

من شبابك .. من نجاحك

قبل ما الحظ يخونك

قبل ما يغمق لونك

قبل ماتصبح طريحة

خد نصيحة

وابتدي رحلة كفاحك

****

كل حاجة في جيشنا .. زيتي

أكل زيتي

لبس زيتي

مخلة زيتي

والدولاب جنب سريرك

لونه زيتي

وخطاوي خط سيرك

برضوا زيتي

والكلام ويا الزمايل

والحزا أبو خط مايل

والقلب اللى ياما شايل

كل ده مصبوغ بزيتي

حتى اسمك

فجأة منك يتسحب

تبقى نمرة

جوة دفتر تتكتب

تبقى عهدة في يد صول

تبقى معلوف البقول

تبقى مغسول العقول

تبقى جندي .. دا المهم

واللى غير ده ينشطب

....

كل حاجة في جيشنا خشنة

الا دقنك.. تبقى ناعمة

كل شيء في جيشنا رجعي

الا اسمك .. يبقى دفعة

كل حركة في جيشنا امر

كل لحظة في جيشنا عمر

الساعات في الجيش تقيلة

الدقيقة بـ 1000 ليلة

باردة قاسية بطعم مر

والأكادة ليها لسعه

كل حاجة في جيشنا خشنة

الا دقنك .. تبقى ناعمة

*******

كل شيء في الجيش ذكوري

والأنوثة معدمة

الهدف م الجيش بطولي

في صناعة الملحمة

ياكتيبة يلا دوري

عرض صفي .. وطول طابوري

الهتاف شمعي ونوري

والندا جاب السما

******

كل شيء في الجيش عسير

والعسير بالحب سهل

كل شيء في الجيش كبير

والكبير يجي بمهل

لجل مصر ياناس تعيش

لجل تعلى ما تنحنيش

بالرضا داخلين ياجيش

كلنا أخوات وأهل

..

كل جند الجيش أخوة

بالطبيعة

بالغريزة

والكتيبة زي بيتي

بس الحاجة المغيظة

كل حاجة في بيتنا ..... زيتي

مركز التدريب

29\ 10 \ 2011