أنا أسف

أهداء إلى الرمز الذى مات مؤخراً..أهداء إلى من قالت لا..أهداء إلى بى نظير بوتو
سامحونى
عايز أبكــى
مش هأقدر أقول كل حاجة فى شعرى
حملى التقيل قطم دهرى
كسر قلمى
وجه وقال
إن الزمان ده ماهوش زمنك
ماهوش زمنى
أنا أسف
مش هأقدر أقول كل حاجة فى نفسى
................
عجز القلم أنه يجيب كلمات
معناه سكات
معناه ممات
معناه راحت ع الشعر والشعرا
راحت على الحبر
و ع الكلمات
معناه خلاص
أحنا فى زمن أخرس
راسم على سقف البيوت غمة
راسم على وش القمر ضلمة
دايس على صدرى
وبيحبس الكلمة
علشان يخلى الشعر م التابوهات
عشان أخاف الشعر
وأبعده عنى
أنا أسف
مش هأقدر أقول كل حاجة فى نفسى
..................
ساعات بأنسى الوزن والقافية
ساعات بأقول الشعر بالعافية
ساعات بظلم الشعر بكلامى
مع أنى - والله - نيتى صافية
ساعات أشوف الشمس قدامى
ساعات أمسك بأيديا أحلامى
وأكتب أغانى..
يادنيا ياغرامى
وأجرى على الشمس بجيوب حافية
ألاقى أيديا بردانة
وألاقى الشمس مش دافية
وأسمع للزمن ضحكة
وصوت كرباج على دهرى
أنا أسف
مش هأقدر أقول كل حاجة فى شعرى
سامحونى
------------------------
ملحوظة
أنتظروا أنظلاق المدونة الجديدة مع العام الجديد..مدونة " من غير أشعار"..؟؟

العيد فرحة...تدوينة العيد

أليكم تدوينة العيد..عارف أنها متاخرة لأنها كانت المفروض تنزل قبل العيد بكام يوم بس معلش..مشاغل والله..وكل سنة وانتم طيبين..واحرار

العيد فـرحة...لأ تفاريح

بسـمـة لـــكل الهم تزيح

أجري يا سوسن هاتى بلونة

وأنت يا عمرو أركب مراجيح

العيد فرحة ...لأ تفاريح

************

العيد طرحة لفستان فرحة

دنيا عروسة وأنت عريسها

العيد نظرة فى عيون سارحة

حلم البنت تلاقي فارسها

حلم البنت أم فيونكات

دنيا جميلة..تبات ونبات

ويجيلها بطل الحكايات

يخطفها على بساط الريح

العيد فرحة..لأ تفاريح

***************

العيد فرحة..يعنى عيدية

يعنى الجيب يبقى له قيمة

يعنى اتفسح فسخة قوية

انا وصحابى نخش السيما

انا وصحابى نغنى ونحلم

خطوينا ع الأرض تعلم

العيد فرحة ..لية نتألم؟؟

لية لسه ما بنا مجاريح

دا العيد فرحة ..لأ تفاريح

**********

العيد فرحة..مأمأماااء

أكلة سمينة ولبس جديد

م الفجرية ووسط خلاء

سوا بنصلى صلاة العيد

عيد ورا عيد..أيامنا بتجري

ننده :حاسب..أهدى وهدى

لسه الدنيا ليها لون وردى

لسه الكون قدامنا فسيح

العيد فرحة..لأ تفاريح

وقفة حداد

وقفة حداد..طالت قوى

جابت ملل

وقفة حداد..أتكررت

ربت علل

وكل يوم على الجثث

بنقيم صلاة

وكل يوم بتنخطف

منا حياة

وكل يوم جوانا لأ

بنقولها آه

يمكن عشان جوه القلوب

فاضل أمل

رغم الملل

رغم العلل

رغم الحداد

**************

وقفة حداد

قبل العزا..قبل البكا

وقفة حداد

دقيقة واحدة متفبركة

أمتى يكون

قبل الحداد فيه معركة

فيها شهادة ولا نصر

طعم العسل

ينهى الملل

ينهي العلل

ينهي الحداد

************

وقفة حداد

حسب اللباقة والكياسة

وقفة حداد

أول دروس السياسة

وقفة حداد

وقفة قرف..وقفة تعاسة

وقفتنا بقى بينضرب

بيها المثل

تنهى الأمل

تحيي العلل

تعمل حداد

التحقيق

نص التحقيقات الرسمية..بأستخدام الأشارات البدائية

نظراً لسوء الفهم المتكرر فى تفسير أسئلة أجهزة الأمن العام ،وأجابات المواطنين فى التحقيقات الرسمية ،أصدرت الدولة قانوناً يحتم على كلا الطرفين أن يسبق حديثه بأشارة توضح المقصود من كلامه...أشارات بسيطه من نوعية (س سؤال...ج جواب)،وعلى الطرف المخالف للقانون أن يقبل بالتفسير التى تراه المحكمة مناسباً لأقواله

:وهذا نص أول تحقيق رسمى جرى بأستخدام هذة التقنية

س:سؤال من غير لماضة-

ولا برطمة وكتر كلام؟

س:سؤال..لساك بتحلم؟؟

أيوة بحلم..لما أنام-

س:سؤال..أزاى بتحلم؟؟-

دى حاجة ضد النظام

س:سؤال ..أنا نفسى أفهم-

هى تهمة والسلام

أمتى كان حلمى جريمة

ولا أثم من الأثام

ح:حقيقة..الحلم ذنب-

الأحلام أصلاً حرام

ح:حقيقة الحلم نعمة-

رحمة من رب الأنام

س:سؤال..أوصف لى حلمك-

م البداية ...للختام

ج:جواب أنا حلمى جنة-

حلمى حب..شوق..غرام

و: دى وصف لعين بتضحك

ووش مليان أبتسام

س:سؤال ..على أيه بيضحك؟؟-

أنطق...جوابنى قوام

ج:جواب على نفسه يضحك-

أصل فيه بينهم خصام

س:سؤال..وضح كلامك-

بين معناة الكلام

ج :جواب... حلمى وروحه-

كانوا فى حالة أنسجام

فجأة جت بينهم قطيعة

صبحوا فى حالة أنفصام

حلمى فوق...روحه تحت

حلمى يصحى..الروح تنام

حلمى يرجع للى فات

روحه تطلع للأمام

س: سؤال..سبب القطيعة-

أيه طبيعته؟؟ وكان بكام؟؟

ج: جواب..حاجة بسيطة-

ضربة من تحت الحزام

س: سؤال ..دا كل حلمك؟؟-

هو دا كل المنام

ج: جواب دا كل شئ-

م البداية..للختام

ن: نصيحة فى النهاية-

أوعى تغفل أو تنام

أوعى تحس يوم سعادة

أو تشوف لك يوم غرام

...دى السعادة

...والكتابة

...والسرور

والأبتسام

...والقراية

...والصحافة

...والتدين

والصيام

...والمحبة

...والمودة

...والفرح

ويا الغرام

وأنتظار بكرة بصبر

ولا رؤية المنام

كل ده فى قايمة طويلة

ممنوع فى عرف النظام

:سجل نص التحقيق

محمد عبد القوى

لما تكون؟؟....الحلقة الرابعة

هذه خلاصه تجربه فريدة فى تاليف الشعر المشترك ،خضتها مع صديقتى الأثيرة ايمان حمودة فى حاله من التوحد فى الوجدان الفكرى والأحساس بالقضيه...وكانت نتيجه هذه التجربه ذلك المسلسل الشعرى والمقسم إلى4 حلقات ،ألفت هى منها الحلقه الأولى والثالثه وألفت أنا الثانيه والرابعه...وأليكم هذا المسلسل راجيا ان ينال اعجباكم،ولا تحرمونا ارائكم أيوة
أيوة بحس أن أنا أنسان
أنا مش بكدب
دايما حاسس ده علشان
بأقدر أكتب
كلمة قلمى نبضة قلب
بتقول أنى قادر أحب
طول ما أنا رجلى ماشية تدب
روحى تدب
فكرى يدب
عقلى يدبدب
لازم أكتب
مهما السكة تبان لنا زحمة
مهما النور يتدارى فى الضلمة
هأنده وأصرخ
هأزعق ياأمه
ضمينا
لمينا
لمى ولادك محلى اللمة
لمى ولاد الأرض الحرة
نسينا طعم الغربة المرة
خلى كبارك ينسوا القسوة
قبل نا نهرب أحنا لبرة
***************
يمكن أه
ماملكش غير ورقة وقلم
لكن لا
عمرى ما شفت حياتى عدم
عمرى ما شفت حياتى سراب
ولا أحلامى أمل كداب
دا أنا لو حلمى جنة بكرة
بعرف أن لبكرة دا باب
....ولو مقفول
جى تقول أن كلامى مش معقول
ولا مقبول
وأيه فى الدنيا كان مقبول؟
إن أعيش بكيان مقتول
إن طبيبى يكون معلول
دا أنا صوتى أعلى من السحاب
ومن العناد
ومن الشجر
طب لية بقى ما أبقاش بشر
طب لية أعيش عمرى وحيد
وحياتى تبقى سكة سفر
ماهوش نصيب
ولا مصير
ولاقدر
يمكن ظروف
عليها توقيع الكبار
بقلوب حجر
لجل أرتضى إنى أنحنى
لجل أنكسر
*************
لية ماتقولش نعمل ثورة
نصرخ فيها بالصوت العالى
هو الرأى دا أصبح عورة
لية بنخبى ...لية بندارى
أية المانع؟؟
دا أحنا ولاد الزمن الضايع
جينا نعيش على أرض الواقع
لاقيناها بور
يبقى الحل
أرمى الفاس وأقول مش زارع
ولا أثور
جى بتسأل لأمتى هنحلم
جى تعد عليا الحلم
طب فى الأول قبل ما تسأل
حس معايا بطعم الظلم
تلقى كل الشعب أتلم
سوا هنادى
سوا هنصرخ
تلقى جدار السجن أتشرخ
تلقى قلمنا واقف بيأرخ
علشان عارف قيمة اللحظة
وقيمة الثانية
عارف أمتى يخلى الحلم
قد الدنيا
أنا ما بقولش نقف ع الكلمة
ولا نعيش بين الأوراق
دا أنا ع العكس شايفها سباق
فيها الكلمة دى أول خطوة
أم الصرخة دى كمان خطوة
خطوة بخطوة
............عالجنا الداء

ألوان خشب

الوان خشب
خرحت على حد الأدب
رسمت حمامه ووردتين
زعماء عرب
عارفين تمام حد الأدب
نشجب..ونستنكر.. ندين
وأدى السؤال من غير خطب
من غير هتاف ونبرة غضب
تختار فريقك يبقى مين؟؟
ألوان خشب..زعماء عرب
دول كفتين
****************
ألوان خشب
عاشت سنين من غير مداد
أصل المداد من قلبها
من دمها
شافت كتير طافت بلاد
رسمت ابوها وامها
دول اهلها
ألوان خشب ليها سنون
ليها عيون
كافحت لألف شعب
بألف شكل
وألف لون
لكن التاريخ نسي اسمها
يمكن عشان بعد النضال
وقت السعاده والهنا
شافت السرور على الجميع
شافت فرح
سمعت غنا
ضحكت ونامت فى العلب
إكمنها ....الوان خشب
***************
زعماء عرب
ورثوا الزعامه ضمن تركه
دوله وشعب كله طيبه
دخلوا التاريخ من انهى سكه
الطيبه ولا المريبه
عايز الحقيقه
ورثونا عزبه وكوم عبيد
حكمونا بالنار والحديد
قلنا نضال قالوا هدوء
نصلوا من غير شوشرة
خلى نضالكوا من سكات
وان حد فيكم وقع ومات
قولوا سماح
العفو عند المقدرة
طب يا زعيم
طب يازعيم يا ابن ال؟؟؟
يا ابن الزعيم
يا ملك الزمن الاثيم
ممكن مسائله صغيرة
عشمتنا ليه بالوعود
وطريق مفروش بالورود
وسحبتنا تانى لورا
عشمتنا ليه بالكلام وبالخطب
وبعد مابقيت لينا زعيم
ديل الكلب رجع لعب
راح عنك طبع الكريم
وطبع اللئيم قوام غلب
يمكن عشان اصلك قديم
فى شله زعماء العرب
***************
أدى السؤال من غير خطب
من غير هتاف ونبرة غضب
تختار فريقك يبقى مين
ألوان خشب
زعماء عرب
دول كفتين

شئ من المسرح ..3

المنتج: بص يابنى...أنت لسه جديد فى الكار وصوتك لوحده مش كفاية عشان الشريط ينجح،أنت يلزمك مؤلف وملحن جامدين يشيلوا الليلة معاك

المطرب: زى مين يامعلم ؟؟

المنتج : مش مهم مين..المهم الملحن يكون أسم..حاجة كدة تخلى الشريط ينباع لوحده،راجل عمله كام كليب على كام حتة مزيكة فى فيلم سَمعت مع الناس ،بس ملحن زى ده هيكلفنى الشئ الفولانى..وانا بصراحه ماحطش قرش

فى حاجة مش مضمونة

المطرب : معناه أيه الكلام ده؟؟

المنتج: معناه أنى أتفقت لك مع ملحن نص عمر ،واد مش معروف..بس واد أيه؟ نمرة 1 ..يعمل اللحن من هنا والناس هاتك يارقص من هنا ...مفيش سواق مكيروباص مايعرفوش ..مفيش دى جى مابيشغلش أغانيه ،دا واد لقطه

نتكلم بقى فى الكلمات..المؤلف أللى هنجيبه لازم يكون فنان،لازم يكون طلع قبل كده مش أقل من ديوانين تلاته..أو ع الأقل قديم فى الكار والناس عارفاه والبنات بتسرح مع أغانيه،بس مؤلف زى ده هيكلفنى دم قلبى..وأنا بصراحه ماحطش مليم فى حاجة مش مضمونة

المطرب : دا كمان؟؟؟

المنتج: أيوة..عشان كدة أتفقت لك مع مؤلف نص لبه،واد ملوش فى الدواوين والكلام ده...بس واد ايه؟؟نمرة 1،يعمل الأغنيه من هنا..تتحفظ من هنا،لأ ومش كده بس ..أغانيه مليانه أيحاءات وأشارات من أللى تنرفز الرقابة،عشان بيبقى معناها معروف ومتقدرش تمنعها..يعنى هنكسر الدنيا

المطرب: أيوة يامعلم..بس الملحن نص عمر والمؤلف نص لبه،كده الشريط عمره ماهينجح..صوتى لوحده مش كفاية

المنتج: صوتك؟؟ صوتك أية ياأبو صوت..دا الملحن والمؤلف كانوا عايزين مطرب كبير..قلت لهم والمطرب الكبير ده هيخلنى أشحت وأدين..وأنا ماحطش سحتوت فى حاجة مش مضمونه،أنا هأجيب لكم مطرب جديد نص كم..بس واد أيه نمرة 1...هربان م الجيش ومتجوز عرفى،وعليه سبسبة شعر توقع المزز فيه..وأهو نجرب..أخدوكم انتوا الأربعة مقاولة واحدة...وياصابت يا4 عور

المطرب: لاااااااااااااااااااااااااااااااااااااااااا

لما تكون؟؟...الحلقة الثالثة

هذه خلاصه تجربه فريدة فى تاليف الشعر المشترك ،خضتها مع صديقتى الأثيرة ايمان حمودة فى حاله من التوحد فى الوجدان الفكرى والأحساس بالقضيه...وكانت نتيجه هذه التجربه ذلك المسلسل الشعرى والمقسم إلى4 حلقات ،ألفت هى منها الحلقه الأولى والثالثه وألفت أنا الثانيه والرابعه...وأليكم هذا المسلسل راجيا ان ينال اعجباكم،ولا تحرمونا ارائكم

بتدور على لحظة أمل
ولا على طريق للنور
نفسك تحس أنك بشر
أنك أنسان بأحساس وشعور
مش هتلاقى
مش هتلاقى بين النور والضلمة فروق
طول مافى ناس تحت
وناس فوق
وسلاح قلمك مش بيغير
هد جبال الفرق وكسر
أنطق قول
أنا صوتى من الظلم برئ
شاعر أنا بحق وحقيق
ماملكش غير ورقة وقلم
وحياة عدم بشعور رقيق
أنا صوتى أعلى من السحاب
ومن العناد
ومن الشجر
وأزاى تحس أنك بشر
طول مابنكتب من غير فايدة
وكلامنا يترمى فى الدرج
تنقص حروفنا ولا زايدة
قلمى طفش من سجنه وهج
بتدور على لحظة حرة
مش راح أكتب أنا بالمرة
غير أهت ودموع وأنين
وده يرضى مين؟؟
يرضى مين أنى أتحبس جوة القلم
لحظة ألم
لحظة ندم
لحظة سكوت
وكله بيعدى ويفوت
نطق الحجر قالها أبو الهول
أن كلامك مش معقول
ولا مقبول
فاكر نفسك كدة أنسان
أكبرجبان
ترضى لية أنك تتهان؟؟
أحساس قلمك اللى انكتب
بقى فى أدراج أكرتها دهب
مش سلبية ولا تشاؤم
بس أنا باصص قوى للواقع
لازم تشعر أنك نادم
على أحلام الزمن الضايع
أنا مابقولش نبطل نحلم
أنا مابقولش نهد الدنيا
أنا مابقولش نعمل ثورة
أنا بحلم على قد ايديا
بس لأمتى هنفضل نحلم
.......بلاش
طب لأمتى هنفضل نكتب؟؟
مستينين نشوف النور
نعدى جسور
نلاقى بحور
وراها بيار
نفوت فى النار
ونعمل زار
وبرضه وحش الغربة ساكنا
عايش فى عقولنا ومساكنا
....مش مهم
بس أنا عندى ليك سؤال
وجوابه قرب المحال
بعد ده كله...
هل بتحس أنك أنسان
لما بتكتب؟؟

أيمان حمودة

ميزان حتب

بصراحة

من غير أدب

من غير كسوف

ضمايرنا شلناها فى علب

على الرفوف

وميزان العدل أتقلب

وتعالى شوف

ميزان جديد أهو أتنصب

وسط الميدان

أروع ميزان

له مكيالين

و 3 كفوف

مكيال مبحبح للكبار

مكيال محندق للصغار

وده مش هزار

دى سياسة عليا مُحكمة

هتحل أصعب مشكلة

وتجاوب أى مسائلة

وتعدينا لبر الأمان

محلى الميزان

محلى الميزان ومحلى أللى بيوزنوا

لو يفهموا

لو يسمعوا

ولا نيام

دا القلب دايب م البكا

وألف مليون مرة أشتكى

وأنتوا نيام

القلب لسه بيشتكى

دى مصيبتى قصة بتنحكى

برضة نيام

كسرت جدران السكوت

وشكيت ياقلبى بأعلى صوت

دول ناس نيام

عملين نيام

وأنتوا عيونكم مفنجلة

ولا فى خشا ولا فى حيا

ولا فى أدب ولا كسوف

ضمايركوا شلتوها فى علب

على الرفوف

***************

بكرة الميزان يصبح صنم

وفينا أللى هيعبده

ويوحده

ويمجده

يبقى مفيش غيره ميزان

دا العدل أللى هنعرفه

وغيره ضلال

غيره محال

غيره محال يوم يتنصب

دا ميزان ضعيف

ورقة شجر

فى عز أيام الخريف

أما ميزانهم شئ بديع

شئ فظيع

عملاق مخيف

أقوى من شجر الربيع

فى الأرض ثابت بالجدور

وأقوى من برد الصقيع

فى القلب ساكن فى الصدور

محتاج دوا

لأ...معجزة

وأحنا الشعوب النامية

النائمة

العاجزة

ربونا ما نشوفش الميزان

ولو نشوف

نعمى عيونا بالهباب

نغرس دماغنا فى التراب

يركبنا خوف

وإن حد فينا فى يوم وقع

فى بير غويط ملهوش قرار

يجى الكبار داقين دفوف

عملين له زار

ينعوه بكلمة وملمين

طب كنتوا فين؟؟؟

طب كنت فين يا أبو العرب

عمال تطوف؟؟؟

وسايب ضميرك فى العلب

على الرفوف

****************

بكرة الميزان يصبح شعار

يملا الجرايد والكتب

يصبح تاريخ

فرعون وأسمه ميزان حتب

بكرة نبنى له الهرم

ونحطه على راس الأمم

وفى عيده العدل ينعدم

لكن زمان

كان الميزان

زى الكابوس ملهوش كيان

بكرة الميزان يصبح علم

بكرة الميزان يصبح علم

غرب...شرق

فى دنيانا بنتلاقى ونتفرق

وده يغرب..وده يشرق

وده يمشى مع التيار

وده يقاوم يقوم يغرق

نذيع خبره

فى ناس تقسى..وناس تنسى

وناس بتقول سنين لسه

على أحلامنا

وسكين الزمن يرسى

على رقابنا

ويسرقنا

أهو بيسرق

ما ده غرب وده شرق

*************

نذيع خبره

فى ناس تقسى تقول جاهل

بيحلم ليه فى زمن مايل

بيبنى فى وطنه ليل ونهار

ووطنه للسقوط آيل

بيحلم ليه بأرض وخير

وحرية وعش الطير

وسجانه ماهوش زايل

وسجانه على قلبه

بقى له سنين

بكرباجه كتير قال له

هتهرب فين

دا أنا وكرباجى دايمين لك

ليوم الدين

بيحلم ليه فى زمن زحمة

وناس ساكنة جحور ضلمة

هجرها النور

جحور مات الأمل فيها

ومسخ اليأس معانيها

وعلى السور

عشان تبقى سجونا جبال

وثورتنا خيال ومحال

جناح مكسور

لا يوم يعلى ولا يحلق

ما ده غرب ..وده شرق

**************

نذيع خبره

فى ناس تقسى فى ظرف يومين

وناس تنسي فى غمضة عين

وناس عاشت على الذكرى

فنسيت حلمها ببكرة

على حالها بقى لها سنين

ولا بتنساه

ولا بتنسى..ولا تفكر

ولا تحرك..ولا تغير

الأنسان جواهم خاضع

راضى أنه يعيشها مُسير

الأنسان جواهم خانع

زى بلادة طفل صغير

الأنسان جواهم راكع

فى محراب الخوف الأعظم

فى محراب الأكبر أعلم

فى محراب الأخرس أسلم

أما الكلمة كتير بتحير

ليه أتكلم ولا أعلق

ما ده غرب ..وده شرق

للقصيدة باقيه

ياللى رافضين الأهانه

أهداء إلى أربعة من أشرف صحفين مصر وفى مقدمتهم الأستاذ : ابراهيم عبسى

ياللى ماسكين القلم

بتحاربوا بيه الخيانة

ياللى رافعين العلم

ياللى رافضين الأهانة

ياللى عارفين إن مصر

مش ضعيفة

مش جبانة

جه خلاص حكم الزمن

جه خلاص قول الوطن

أغراقوا فى بحر المحن

أنتوا وأقلامكم سجانه

ياللى رافضين الأهانة

****************

ياللى عملين المعارضه

لجل مصر

لجل نهضه

ياللى قلتم ليه هنسكت

بسكوتنا مين هيرضى

اللى قاعدين ع الكراسى

كله بيعد فى فلوسه

ولا النايمين ع النواصى

واللى مش لاقى غموسه

واللى فارد خده عجمى

للكبير علشان يدوسه

...........

بسكوتنا من هيرضى

وبكلامنا مين هيزعل

ولا يغضب

وبقلمنا مين هيفرح

ولا يعُجب

ياللى جبتم ألف حق

ياللى قلتم ألف لأ

ياللى علموتنا نخلص للوطن

مهما كان بينا بيلعب

ياللى علموتنا يعنى ايه حرب الكلام

ياللى عرفتونا أمتى نقول سلام

أكتبوا ياللى كلامكم

ع الكبير زى الرصاص

أكتبوا ياللى حروفكم

ع الكبير ولا ألف دانة

ياللى رافضين الأهانه

*************

ياللى قلتم مهما يحصل

لسه فيه فى بكرة أمل

يا قلتم مهما نعمل

لسه فى شئ يتعمل

ياللى شايلين القضية

مهما جابت من علل

ياللى عشتوا سنين عشانا

أحنا منكم

أنتوا منا

اللى هانكم...برضه هانا

والألم مش محتمل

أشربوا كاس الكرامة

وأنفضوا تراب المهانة

دا أنتوا اصحاب الرسالة

دا أنتوا حاملين الأمانة

دا أنتوا رافضين الأهانة

شغل كايرو....شغل على ميه بيضه

زمان لما كان استاذ العربى يقعد يشرح لنا درس النصوص كان بيعرف الشعر على انه "الكلام الموزن المقفى"....بس لا اكتر ولا اقل ،يعنى لما تقعد مع نفسك وتمسك ورقه وتكتب فيها بقين موزنين تبقى انت شاعر بغض النظر بقى عن الاحساس والمعنى والقضيه..المهم عند الاستاذ الوزن والقافيه اما الحاجات (الهايفه)التانيه فدى مش مهمه وحتى لو حد جاب سيرتها هيقول "يعُاب على الشاعر" أو" مأخذ على القصيدة" لكنه مش هيرفض القصيده ككل

وكبرت وعرفت ان الحكايه عند استاذى -الذى اكن له كل تقدير واحترام -وكذلك عند كتب الوزارة بصراحه....بزرميط

اه..لانى لقيت الشعر حاجه تا نيه خالص وان الشاعر لازم يحس وبعدين يتكلم....من غير وزن..من غير قافيه..ان شاالله من غير حروف,المهم القضيه..المعنى..الغايه

وده اللى واضح جدا فى ديوان شغل كايرو للاستاذ محمود عزت ..اللى قدر ان يصنع بلقطات صغيرة افلام ضخمه..وقدر يطلع الموسيقى من معنى الكلام مش من اتزان حروف الكلمات

تحيه ل..محمود عزت

ولا عزاء لكتب الوزارة

ملحوظه: لقرأة بعض قصائد الديوان يمكنك الدخول على موقع دار سوس للنشر( اللينك بتاعها موجود عندك ..ايوة3 واحد)..بس خلاص

لما تكون..؟؟.....الحلقه الثانيه

هذه خلاصه تجربه فريدة فى تاليف الشعر المشترك ،خضتها مع صديقتى الأثيرة ايمان حمودة فى حاله من التوحد فى الوجدان الفكرى والأحساس بالقضيه...وكانت نتيجه هذه التجربه ذلك المسلسل الشعرى والمقسم إلى4 حلقات ،ألفت هى منها الحلقه الأولى والثالثه وألفت أنا الثانيه والرابعه...وأليكم هذا المسلسل راجيا ان ينال اعجباكم،ولا تحرمونا ارائكم

لما اكون مخنوق متضايق

..هاقعد ساكت

احسن حاجه ابطل افكر

يبقى شعارى اضحك كركر

ما المستقبل قفل الباب

لما اصرخ وسط الزحمه

يفضل صوتى رايح راجع..

هاعرف ان دى حاجه عاديه

فى عاقل فى الزمن الضايع..

مستنى لصرخه جواب

كله بيتكلم فى كلام مش عارف معانيه

ليه مستغرب ودى فيها ايه؟

ما احنا فى زمن الكل حكيم..الكل فقيه

شوف لك يابع تبقى السيد

زعق واخطب تبقى زعيم

ضعت خلاص مش لاقى مكان

يمكن اه على ارض الواقع

لكن ابن الزمن الضايع

عنده قصور ارض الاحلام

مهما تفكر مش هتغير

يبقى الاحسن ابطل افكر

وارجع تانى اضحك اكركر

يبقى شعارى لامبالاة

دى السلبيه احلى حياة

لكن لحظه هافتح عينى

لحظه هاحس بشوق للنور

لحظه هاشوف السلبيه

واحلم انى باهد السور

احلم انى افرد ظهرى

بعد ماعشت سنين مكسور

احلم انى يبقى لى صوت

واكرة انى اعيش فى سكوت

اكره ان حياتى تترتب

بايدين غيرى

واكره انا اللحظه تموت

امسك قلمى واقعد اكتب

من تفكيرى

فبل اللحظه دى ماتفوت

بس ساعتها باعرف انى

حى وعايش

انى انسان

انى بشر باحساس وشعور

مش تمثال

مش تمثال فى جبل منحوت

محمد عبد القوى

لما تكون....؟؟ الحلقه الاولى

هذه خلاصه تجربه فريدة فى تاليف الشعر المشترك ،خضتها مع صديقتى الأثيرة ايمان حمودة فى حاله من التوحد فى الوجدان الفكرى والأحساس بالقضيه...وكانت نتيجه هذه التجربه ذلك المسلسل الشعرى والمقسم إلى4 حلقات ،ألفت هى منها الحلقه الأولى والثالثه وألفت أنا الثانيه والرابعه...وأليكم هذا المسلسل راجيا ان ينال اعجباكم،ولا تحرمونا ارائكم

لما تكون......؟؟

لما تكون مخنوق متضايق تعمل ايه؟؟

لما تكون اصلاً مش عارف زعلان ليه؟؟

لما تضيق بيك الأيام

لما تتوه وسط الأوهام

لما تدور على المستقبل تلقيه ضايع

لما تصرخ وسط الزحمه..

لما تمل..ولما ولما

يفضل صوتك رايح اجع

وأهو كله كلام

كله بيتكلم فى كلام مش عارف معانيه

كتر الكلام ..قل الكلام

عشت سنين جوه الأوهام

مليت من الشكوى ومن الحرمان

ماتلمش غير نفسك

حاجه هتحصل من غير تفكيرك أو بيه

كله بيتكلم فى الكلام مش عارف معانيه

اااااه

لسه ماقلتش تعمل أيه؟؟

والله ماعارف أقولك أيه؟؟

أصل أنا زيك

بأزعل زعلك

كل ما فيك جوايا تلاقيه

حتى أنا أهو كمان مش عارف...بأكتب ليه؟؟

أيوه صحيح أنا بأكتب ليه؟؟

ايمان حمودة

شىء من المسرح 2

حوارات..2

المنتج: عايزين نعمل فيلم

المؤلف: أنا من أيدك دى لأيدك دى

المنتج: طب هتسلمنى الورق أمتى؟؟

المؤلف: مش لما أعرف الأول أنت عايز تناقش قضيه أيه؟؟

المنتج: مفيش قضيه

المؤلف: يعنى أيه مفيش قضيه؟؟

المنتج: يعنى أكتب اللى أنت عايزة..المهم عندى أن الناس تموت على نفسها من الضحك..وتغرق فى عرقها من الأغراء..وتمسك فى بعضها من الأكشن

المؤلف: ياه....بس ده هيكلفك كتير

المنتج: يكلفنى كتير ليه؟؟دا شويه حبر على ورق

المؤلف: ما بتكلمش على نفسى..أنا بتكلم على التنفيذ..الفيلم نفسه

المنتج:..لا ما يهمكش حاجه..أصل أنا لعبتها صح، وكمان النجوم أكرمونى..البطله عملت خصم من أجرها 15 % مرة واحده

المؤلف: ليه؟؟

المنتج: عشان الفرقه أللى شغاله معاها فى الكباريه هى أللى هتعمل مزيكه الفيلم

المؤلف: طب والبطل؟؟

المنتج: عمل خصم 25%..عشان البنت بتاعتههتعمل دور السكرتيرة..ولهم مع بعض كم مشهد أيه..ولعه، حط ده فى بالك وأنت بتكتب

المؤلف: طب دول الممثلين..المخرج بقى نظامه أيه؟؟؟

المنتج: مخرج مين؟؟

المؤلف: المخرج بتاع الفيلم

المنتج: ياعمنا..أنت هتألف..هما هيمثلوا..وأنا هاصرف, أيه بقى لازمه المخرج؟؟؟

المؤلف:؟!؟!؟!؟!؟!؟!؟!؟!!؟!؟!؟!؟!؟!؟!؟!؟!؟

شىء من المسرح

حوارات....1

وكيل النيابه: أحنا هنحبسك أربع أيام على ذمه التحقيق

المواطن: بس أنا برىء.....أنا ما عملتش حاجه

وكيل النيابه: وأنت ايش عرفك؟؟

المواطن: أمال مين اللى هيعرف؟؟

وكيل النيابه: أحنا....أحنا نعرفك أكتر من نفسك

المواطن: أزاى بقى ؟؟

وكيل النيابه: أنت تعرف ضغطك كام دلوقت؟؟قلبك بينبض كام نبضه فى الدقيقه؟؟بتطلع كام لتر عرق فى اليوم؟؟ العلاوة اللى أنت مستنيها

هتجى ولا لآ؟؟؟ تعرف حاجه من ده كله؟

المواطن: أبداً

وكيل النيابه: أحنا بقى نعرف,لأ وأيه!!..نقدر نزود لك ضغطك ونوقف قلبك ونشف عرقك ونمنع عنك العلاوة,يبقى نعرفك أكترمن نفسك ولا لأ

المواطن: فعلاُ....بس مادام الموضوع كده,تسمح تقولى أيه تهمتى؟؟

وكيل النيابه: لسه معرفش بس التحقيق شغال وأكيد هنوصل لحاجه

المواطن: بس أنا ما عملتش حاجه

وكيل النيابه: أمال جابوك هنا ليه؟؟

المواطن: معرفش...ثم كمان القانون بيقول المتهم برىء حتى تثبت أدانته,وما دام مفيش أدانه من أصله يبقى أخد أفراج مش اربع تيام حبس

وكيل النيابه: عايز تقول أن أحنا شاغلين غلط

المواطن: أنا ما قلتش كده

وكيل النيابه: بنرمى الناس بالباطل

المواطن: يا أفندم أنا ما أقصدش

وكيل النيابه: عالم مفتريه أحنا

المواطن: أنشك فى لسانى لو كان ده قصدى

وكيل النيابه: خلاص يا أستاذ...كلامك فيه التهمه والدليل,وكله متسجل صوت وصورة...شكراُ لأنك أعترفت..أحنا كنا عارفين أنك مش هتضيع تعبنا هدر.............يحبس 15 يوم على ذمه التحقيق ويراعى التجديد فى الميعاد...اللى بعده

المتهم:؟؟؟؟؟؟؟؟؟؟

غنوة المصرى

أنا منك

أنا ليكي

أنا المولود على أيديكى

أنا المكتوب على أسمك

وكل ماقيا منيكي

دا حتى لحمى من طينك

وشوفى سمارى من نيلك

وقلبى عاش يغنيلك

يغنيكى

يناديكى

عشان منك..

عشان ليكى..

عشان مولود على أيديكى

***************

أنا منك

أنا أبنك

أنا المولود على كفك

أنا الغريب على أرضك

أنا اللى حلفت أشيل همك..

ولو همك بحور وجبال

هأشيله..وقده وزياده

أنا المصرى..

أنا أرادة..

عشان خاطرك ياولادة..

أشوف أهوال

عشان خاطرك صحيح يا أمه

أخوض الزحمه والضلمه

ولا تباتى على العتمه

ولا يبات لك جناح مكسور

دا أنا لو ضاقت الدنيا

أجيب لك من عنيا النور

ينور تانى أراضيكي

ماهو منك..ماهو ليكى

ماهو مولود على أيديكى