يالا ياحاوي

جزء جيد من قصيدة غير جيدة

يالا ياحاوي
روح أتنجر
لمع وشك علشان يظهر
بكرة ياحاوي جرابك يكبر
يبلع كل كياس أعدائك
تبقى الدنيا هي جرابك
يالا ياحاوي
عبي جرابك

رسالة من الأقصى

فى رسالة من صديق فلسطينى وصلنى ملف الفلاش ده وفيه معلومات مهمة جداً عن مسجد الأقصى ، معلومات ممكن تكون قديمة لبعضنا لكن هي أكيد جديدة لغيرهم ..ياريت ياجماعة تستعرضوا المعلومات اللى في الملف وتعرفوا بجد المسجد الأقصى وشكله وقيمته ، ونعرف الخطأ اللى بيقع فيه أغلبنا والخلط اللى بيحصل بين أولى القبلتين ومسجد قبة الصخرة

الملف أهو

ياريت تحملوه و نسألكم الدعاء

مستحيل يامصر اشوفك

قبل ما أكتب

جه على بالي فجأة سؤال ..

بس مُلح

لية انا بكتب عنك أنت ؟؟

رغم كل مافايض فيك ..عندي يشح

ويبقى مفيش

لية مُصر اني أعيش؟؟وانت عايشة جوه مني

لية كتابتي تنادي قلبك؟؟

رغم انك كاسرة قلبى

ماصة دمي

لية بحبك غصب عنى؟؟....

كل حلم فى يوم حلمته

لية لقيتك جوه منه؟؟

ساكنة فيه

كل شعر فى يوم كتبته

لية لقيت أسمك عليه

كل صورة من حياتي

ويا أمي

ولا أبويا

كل لعبة لعبتها

ويا صاحبى

ولا اخويا

كنت دايما لية معانا ؟؟قولى لية؟؟.....

دمعة نزلت من عيونى

رعشة مسكت فى ايديا

والقلم م الحزن شطب

والنسيم قرب عليا

جه وهفهف

قالى افهم

قالى اعرف

وقبل ماتكتب كلامك..طير ورفرف

بص شوف..

هي أية ؟؟.. ولا مين؟؟

غير غلابة وطيبين

هي ست عجوز بتضحك

لابسة توب أسمر حزين

هي مين ؟؟..ولا أية ؟؟

هي رسمة على الخريطة

ولا عسكرى بشريطة

هي حاجة صعبة مرة

ولا طيبة وبسيطة

هي مصر قريبة منك

ولا مصر غريبة عنك

هي مصر مراة أبوك

ولا مصر بجد امك

.................

جت إجابتى فى جملة واحدة

ليكي هاكتب والسلام

دا أنا سمعك زي غنوة

دا أنا شايفك بنت حلوة

ومهما تيجي الريح تهزك

ولا تلقي ألف نوة

مستحيل يامصر اشوفك

سجن وعساكر نظام

الكابوس

نايم أيوة

لكن عينى كانت مفتوحة

شفت قلوب الناس مجروحة

شفت رقابهم كات محنية

شفت عيونهم كات ممسوحة

شفت النيل الأسمر تحتى

واقف .. ثابت

مابيمشيش

شفت الطير على توتة بتنا

قاعد .. ساكت

مايغنيش

حتى جناحه كان مكسور

كان عريان

من غير ريش

شفت كتير مع أنى في ضلمة

شفت أبويا في وسط الزحمة

سابنى لصدمة

ماعرفنيش

......

قلبي أتهز

أه ..أنا خفت

نايم أيوة

لكن رغم النوم أنا شفت

علم دا ولا

حلم دا ولا

كابوس ماعرفت

حد يجاوب ..

أيها حد

محتاج منكم أيها رد

محتاج قرصة علشان أصحى

محتاج ضربة قوية بجد

محتاج لسعة نار على أيدي

ياهتحرقنى

ياتدفينى

لكن خوفى اللى يصحينى

مايكون إلا لسعة برد

وأعرف أن كابوسي حقيقة

وألقى باب النور أتسد

ألقى باب النور أتسد

حتة طوبة

تحديث : بوست جديد على من غير شعارات

__________________________

- حتة طوبة

خبطت طوبة

جت الطوبة فى المعطوبة

زقت صخرة كبيرة شوية

فجأة الدنيا بقت مقلوبة

- تبقى دي أية ؟

- تبقى دويقة

- ولا سريقة

- عايز الحق ولا قريبه

- عايز الحق ابن حقيقة

- تبقى سويقة

والمتباع فيها الإنسان

مطلوب أرخص الأتمان

ممكن حتى ببلاش خالص

- يامحلا كرم الأوطان

بس دا لية ؟

- لية على أية ؟

- علي يموتوا بالمجان

على يموتوا من غير قيمة

- وهما يعنى عاشوا أزاى ؟؟

عاشوا دكاترة

ولا أستاذة ..

ولا عاشوا نجوم فى السيما

دول عايشين على قولة جااااااااى

- واللى يعيش يكح تراب..

لازم برضة يموت فى عذاب ؟!!

أقل مافيها يموت بنى أدم

يموت إنسان

- تيجى أزاى ولا منين ؟؟

دولت أصلا مش بنى آدميين

- بتقول أية ؟!

كلمة حق

اللى يرضى بعيشة تطق

اللى يمص فى دمه البق

اللى بينسى كلمة لأ

ده إنسان

- أمٌال أية ؟؟
- كائن حى بلا عنوان

حاجة وفايضة عن الأوطان

ولا وباء
او سرطان
- طب أخرتها ؟
- راس الحية .. هنموتها
- راس الحية أية ياجبان ؟!!
- اللى بيته فوق الطوبة
اللى خبطت فى المعطوبة
- دا غلبان
مش تعبان
حى وميت عايش يحلم
نفسه يكون ولـ يوم إنسان
نفسه يكون ولـ يوم إنسان
نفسه يكون
ولـ يوم
إنـ .. سـ ..ـان

عربية التين الشوكي

عايز أوضح حاجة بسيطة قبل ماتقروا القصيدة الجاية ، وهى ان أنا إنسان مسلم وعارف ربنا كويس ، لا أنا شيوعى ولا أشتراكى ولا أنا مؤمن بالمذاهب وان النظريات دي خالص ، واى تشابه بين كلماتى الجاية ومبادئ الشيوعية فده راجع لتشابه حالنا دلوقت مع الدول اللى الشيوعية اتعملت عشانها مش أكتر ، الكلام المكتوب ده ماهو إلا صرخة أعتراض على تردى الأوضاع وأزدياد الفجوة بين الناس اللى فوق وبينا .. احنا الناس اللى تحت لكن هو لا حقد طبقى ولا أى حاجة من الكلام الفاغ ده .. ودمتم

عربية الجيب شيروكى

وعربية التين الشوكى

بيقولوا كلمة حق

دا سيد .. ودا مملوكى

************

الفرق عمال يوسع

والجرح لسه بيوجع

والق مش راح يرجع

إلا بسجن اللى باعوكى

...

عربية التين الشوكى

بتقول أن أنا مملوكى

*************

لا أنا ماركس ولا شيوعى

ولا جي أشحت بدموعى

أنا عايز حق ضلوعى

اللى أنطحنوا وبنواكى

....

عربية التين الشوكى

بتقول ان أنا مملوكى

**********

مش طالب تأميم تركة

ولا عايز أشمع شركة

أنا طالب حقى فى بكرة

وحياة امك وأبوكى

..... عربية التين الشوكى

رمضان طيب

أجرى يا سمعة

أشترى شمعة

خلى فانوسك نوره يزيد

آآآآه يا هنانا

رمضان جانا

30 يوم بعديهم عيد

***********

رمضان جانا

30 يوم

يالا ياسمعة أتحرك قوم

أقرا فى مصحف

صلى

وصوم

وأرجع طاهر زي ( وليد )

آآآه ياهنانا

رمضان جانا

30 يوم بعديهم عيد

*********

رمضان جانا

طل هلاله

طل بنوره

بانه بجماله

أنده عمو وطنط وخالو

مش عايزين ولا حد وحيد

رمضان جانا وبيجمعنا

علشان يزرع أجمل معنى

يالا يا باغى الخير أسمعنا

وأنت ياباغى الشر بعيد

***********

رمضان جانا

حالو يا حالو

هات التمر فى مية وبلوا

خلى ذنوبنا شوية يقلوا

وأغسل قلبك .. يبقى جديد

رمضان جانا

وحوى يا وحوي

قولها فى نومى

قولها فى صحوى

وبالعامية

أو بالنحوى

رمضان طيب

شهر سعيد

رمضان كيمو

كل سنة وانتم طيبين ..رمضان خلاص فاضل علية أيام ويبتدى ، وتبتدى معاه أيام جميلة ورحلة ممتعة للسمو والتطهر ، بس بصراحة أنا فرحتى برمضان زيادة شوية السنة دي ، وده لأنه جي فى نفس وقت عيد ميلاد بنتى وحبيبية قلبى قلم الحرية

أيوة ياجماعة قلم الحرية كبرت وبقى عندها سنة ..12 شهر ، بقى عندها 29 بوست واكتر من 3000 زائر ، صحيح هو رقم صغير جداً لو قارناه بزوار مدونات تانية لكن أنا سعيد جدا بالرقم ده وبحمد ربنا عليه ، وكفاية أنكم تعرفوا أنى كنت بقول لو المدونة دخلها 100 زائر بس فى اول سنة يبقى حلو جدا وكرم من ربنا ، سعادتى أكتر بقى بالصداقات اللى كونتها من خلال المدونات بأشخاص عمرى ما شفتهم وماعرفش حاجة عنهم غير اللى قريته على مدوناتهم أو فى خانة التعليقات عندى ، زى عصفور المدينة ومصر اللى ماشفتهاش ودعاء مواجهات وحلم الحرية ، أو أشخاص قابلتهم مرات قليلة جدا وكان لقانا الأكبر على النت زى أحمد الديب والمواطن مطحون وأحمد الصباغ

أنا عايز أعمل عملية تقييم بسيطة لنفسي ولمدونتى العزيزة ونفسي - لو سمحتم - تشاركونى فيها ، يعنى مثلا ياريت تقولوا لى أكتر بوست عجبكم ع المدونة ؟؟ واكتر بوست معجبكوش ؟؟ لية بوست وقفة حداد خد أكتر كمية تعليقات رغم أن فى حاجة أفضل منه ، ولية بوست أنا أسف وبوست إنسان كفيف ماخدوش ولا تعليق رغم أن كل اللى سمعهم او قراهم خارج المدونة قال عليهم كويسين .. عايزكم من منطلق الصداقة تساعدونى عشان أخلى المدونة أحسن وأجمل ، والجميل محفوظ .. زيارتكم هتترد لكم والرأى بالرأى والتعليق بالتعليق

وأخيراً بوجه للجميع دعوة لقراءة أول بوست على قلم الحرية ( غنوة المصرى ) المنشور فى أغسطس 2007

ورمضان كريييييييييييييييييييم

إنسان كفيف

إنسان كفيف
عايش فى عالم م الضلام
لكن نضيف
عايش فى دنيا م السواد
لكن شريف
عايش بكلمة حق
أو كلمة قدر
وكل خطوة معاه سكة سفر
عايش بنقطة ضعف فى عيون البشر
لكنه - أبداً - مش ضعيف
إنسان كفيف
**************
إنسان كفيف
لكنه - وللعجب - قادر يشوف
قادر يرفرف زي طير
ويطير
يطوف
عايش فى عالم م الضلام
لكنه عمره ما حس خوف
وبدل عيون الوش له ألف عين
عين فى العصا
عين فى الأيدين
وعنين فى القلب الحزين
قلبه الرهيف
إنسان كفيف
*************
إنسان كفيف
حافظ ملامح الطريق
عارف مكانه وموقعه
فاكر كويس اللى فات
أما اللى جى متوقعه
إنسان ضرير
لكنه بالنفس عزيز
طعم الحياة رغم السواد لساه لذيذ
وطعم الرحيل لساه مرار
وطعم الحنان بيوجعه
يمكن عشان بيفكره
ويفوقه
ويرجعه
لمكانه الحقيقى والسخيف
لمكان الإنسان الكفيف
إنسان كفيف

التحقيق 3

هل لديك أقوال أخرى

لو مستغرب رقم 3 فأقولك ان ده لأن فى التحقيق 1 ( نوفمبر 2007 ) والتحقيق 2 ( أبريل 2008 )
مع الأعتذار للغتى العربية

___________________________


تم القبض على مواطن مصرى و أتهم بـ ( التظاهر - التجمهر - محاولة قلب نظام الحكم - خرق الدستور - معداة التوريث والتزوير ومبدأ الوساطة - الأعتصام ) فكان رده كما سنقرأ ، يجب أولا أن نعرف أن هذة التهم غير قانونية ولا يجود قانون بها ، القصيدة هذة المرة بالفصحى على غير عادة الأجزاء السابقة ، التحقيقات من هذا النوع تكون مجهزة مسبقا لذا تنتهى سريعا وتبدأ بعبارة ...



هل لديك أقوال أخرى ؟!

قبل أن تُرفع الأقلام

أو يُطوى الورق

هل لديك أى أطواق نجاة

أو قشةً

تنجيك من غرق

- بل لدى أعتراف ..

لختام المعركة..

لنهاية القلق

لدى أعتراف لختام المعركة

أنا من ألقى نفسه..

فى بحار التهلكة

أنا من وضع قلبه ..

تحت رأس المطرقة

أنا من وضع عنقة فى حبال المشنقة

وأنا من شنق

أعطيكم اليوم دليل إدانتى

دليل محبتى ومصيبتى

فاللعنة علي

اللعنة على من عشق

رُفعت الأقلام

والمحضر إنغلق

***************

أعترف - صاغرا -ً بكل جرائمى ..

وكوارثي..

والأتى

( تظاهرت ) مع نفسي أمام مرآتى

وهتفت فى سري ..

لاعناً ذاتى

( وقلبت نظام الحكم ) ..

على رف مكتبتى

( وخرقت دستور ) أحلامى ونزواتى

أنى رفضت ( توريث ) أقلامى لوالدتى

ورفضت فى الحب ( تزوير ) القبلات

ورفضت ( توسط ) زميل مدرستى

للصلح ما بينى وبين فتاتى

واليوم أبقى فى زنزانتى وحدي

لأبدأ - طوعا - أولى أعتصاماتى

ها انا قد قلت ما عندي

وانهيت لتوي كل أعترافاتى

ها انا قد قلت ما يكفى

ومازال فى جبعتى بضعة أتهامات

أقبلوا منها ما صادف أهوائكم..

وأرفضوا منها ما فضح مأساتى

أقلبوا الحق زيف

وأجعلوا من الزيف حق

ومن القادم غادى

ومن الغادى أتى

فهكذا تكونون أنتم دوما

وهكذا دوما تبقى حياتى

صباح معطر

صباح معطر بالياسمين

على عيونك يا حكومة

صباح قفا ومعاه قلمين

على ضربتين من الشومة

أحنا الشعوب المسلوبة

أحنا القلوب المكروبة

أحنا النفوس المغلوبة

على أمرها وملهاش قومة

صباح معطر بالياسمين

على عيونك يا حكومة

صباح بايعنا وخصخصنا

صباح رامانا ورخصنا

صباح سطلنا ورقصنا

على دوم تتك دومة دومة دومة

صباح معطر بالياسمين

على عيونك يا حكومة

صباح دلع ولبان سحرى

ودعم يتلغى ويجرى

صباح ناموسيته كحلى

ما تفوقوا بقى من دي النومة

صباح معطر بالياسمين

على عيونك يا حكومة

عدنا

خلصت امتحانات يا بشر

هيييييييييييييه

بعد اللجنة

وبعد الفاصل

عدنا ندون

عدنا نواصل

عدنا ننقل بثنا ليكوا

عن الجارى

وعن الحاصل

******

بعد الحبسة

جوة اللجنة

عدنا ننقل نبض الشارع

بعد تخلف فى مناهجنا

عدنا تانى ننط موانع

راجعين هنا علشان نتعلم

ننطق ..نكتب ..أو نتكلم

لكن جوة لجان الجامعة

مركز تفكيرنا كان فاصل

عدنا ندون

عدنا نواصل

**********

بعد اللجنة الوقت الفاضى

ولا كورس ولا محاضرة

أعمل فيها عم القاضى

ولا زعيم حركة النهضة

يعنى أتكلم من جوايا

يعنى أطلع ألف هواية

يعنى أصحح مفهوم خاطئ

إن أجازتى فرض كفاية

كل أجازة وأنتوا بخير

وانتوا بتدونوا حياتكوا

بكرة كلامكم يطرح طير

يعبر كل أسوار لجنتكوا

بكرة هيعلى صوتنا العالى

صوتنا الغالى

صوتنا الباسل

بعد اللجنة

وبعد الفاصل

عدنا ندون

عدنا نواصل

تحياتى لكل المدونين اللى خلصوا أمتحاناتهم ، وعقبال الباقيين ، وبالنجاح والتوفيق للجميع

وأسف على مستوى الزجل بس دي لحظة حماس بعد أنتهاء أخر يوم أمتحانات

لأنك وطن

لأنك وطن

ونغمة موسيقى وحالة شجن

لأنك قريبة

وصديقة
وطبيبة

لأنك حبيبة..لأنك سكن

لأنك حياتى التعيسة..السعيدة

لأنك حكايتى القديمة ..الجديدة

لأنك معايا

وبرضة بعيدة
كأن مابينى وبينك زمن

لأنك كلامى وشعرى وروحى

لأنك معايا فى سري وبوحى

لأنك دوايا

وبلسم جروحى
وأيدى فى أيدك فى ساعة المحن

لأنك جزيرة

وبحر

ومرسى

لأنى عشانك..بسامح وأنسى

لا بقدر أغضب

ولا بقدر أقسى

لأنك آدابى وطبعى الحسن

لأنك منامى القديم المحال

لأنك حلالى

وحبك حلال

لأنك بحور..لأنك جبال

لأنك حضن كبير أتحضن

لأنك سمايا وأرضى وفاسي

لأنك عشيرتى

وأهلى..وناسي

لأنك بدايتى

لأنك خلاصى

لأنك حكاية هأقولها علن

لأنى بأكون لك
وعايش فى قلبك

لأنك وطن

يامصر بحبك

يا نهار تدوين

أشتركت منذ مدة مش طويلة فى جروب على الفيس بوك يدعى (مدونات مصرية للجيب )وكان اول فعاليات الجروب هى الرسالة التالية واللى فضلت أن أنقلها لكم زي ماهى لأنى حسيت فى صغيتها مش مجرد رسالة مرسلة قد ما هى وصف لحلم صاحبها وأحلام مدونين كتير معاه ..وهاهى رسالته

السلام عليكم لكثرة الاستفسار حول هذا الموضوع حتى الان لم يتم تجميع الماده من المدونات هناك مدونات يتم ترشيحها وننتظر منكم المشاركه بأعمالكم ابعتولنا الاعمال على الايميلات عشان يتم ادراج الاعمال بالكتاب لسه الفرصه مفتوحه والوقت مفتوح لغاية اخر شهر مايو مازال هناك شهر ونصف على تلقى الاعمال ومن فضلكم جميعا تعلنوا عن الفكره فى مدوناتكم الموضوع دا حلم حلم ان يكون كل مدون بيشارك فعلا فى ثقافة عامة الشعب ان يقرالنا الشباب والشيوخ والقرى والنجوع حلم ان كل مواطن مصرى يبقى فى ايده مدونه ماشى بيهاومش بس مدونه دا مجمع مدونات من ابداعاتكم الادبيه والاجتماعيه ووجهات نظركم العمل مش حكر على الاعمال الادبيه بس لأ اى مدون من حقه انه يعرض وجهة نظره للناس مش بس الكتاب المشهورين والشعراء المشهورين هما اللى من حقهم يوجهوا ثقافة جيل احنا اللى بنمثله الجيل دا جيلنا واحنا لازم اللى نعبر عنه برؤيتناعايز اقولكم ان مجتمع المدونين اصبح مصطلح لا يستهان بيه فعلا وعشان كده يا ريت محدش يستصغر قيمته فى عالم المدونين ويا ريت نكون عندنا ثقه فى نفسناوالجروب دا لازم يعبر عننا وعن رؤيتنا احنا ميتين الف مدون بنشكل صفوة المدونين المنفتحين على العالم الخارجى من الثقافات الاخرى بجد انا واثق فيكم وبجتهد انى احقق حلمكم بس الايد لوحدها متصقفش اعلن عن حلمنا ولو ببوست صغير زى مدونة عايزه اتكلم اعلن عننا ولو ببانر ولو بدعوة او ايفنت تعمله على الفيس بوك اعلن عن نفسك لأن دا حلمك انت كمان

أحمد مهنى

أية رأيكم ؟؟ اللى عايز يوصل للجروب عنده لينك بروفيلى ومنه للجروب لأنى مشترك فيه

على صوتك بالغنا ...لسه الأمانى ممكنة

التحقيق 2

لقرأة التحقيق 1 ( نص التحقيقات الرسمية بأستخدام الأشارات البدائية ) أدخل على الأرشيف شهر نوفمبر 2007 بوست التحقيق

يعتبر التحقيق 1 الجزء الأول من هذا البوست

ديموقراطية التعذيب

إلى عزيزنا المتهم

بكل تهمة عندنا

نظرا لأنك من الوطن

ووطنا أمره يهمنا

عملاً بمبدأ المشورة

ورعاية حق البشر

وأتفاقيات العروبة

للأشتغال المفتخر

وتوجيهات الزعيم

وولى عهده المنتظر

بنخيرك

ونحيرك

وبنسألك من قلبنا

سؤال بسيط لكنه هام

من غيره هيطول الكلام

من غيره هتتعبنا معاك

ونجيب أبوك

ونجيب حماك

يمكن كمان تيجى المدام

سؤال بسيط لكنه صعب

ولا طالبة خوف

ولا طالبة رعب

ولا طالبة لف ودوران

ونقول ماكنش

تقول دا كان

دى البندقية ليها كعب

......

دى البندقية ليها كعب

وليها بوز

والنرفزة شيء محتمل

وشيء يجوز

فجاوب سؤالنا بأختصار

وبلاش تعمل فيها حمار

لالدنيا تبقى ضرب نار

ولونها كحلى بعد روز

أما سؤالنا المحترم

اللى الكلام والعين عليه

فهو عزيزنا المتهم

تحب تتعذب بأية؟

عندنا كل شيء متاح

وشتى أنواع السلاح

لو كنت طير ولك جناح

وسألت أمتى ؟ أزاى ؟ وليه ؟

هنقص ريشك ريشة ريشة

وتبقى مسخة

وتبقى خيشة

وكل يوم تصبح تقول

ملعون دي ابوها عيشة

أما لو كنت نبيه

وقلت اللى نقولك عليه

ومضيت أعترافك من سكات

من غير ما تقرا اللى فيه

تبقى حبيبنا ومننا

و أبن الوطن

يعنى أبننا

واحنا قلنا م البداية

وطنا أمره يهمنا

رباعيات: يمكن..يجوز

:الواهم

يمكن .. يجوز .. أو محتمل

الشعب ده عـنـده أمــل

إن الزعيم يشبع زعامة

ويسبنا يوم من الملل

يمكن يجوز ..أو محتمل

:النائم

يمكن يجوز .. طب لأ ليه

يحط حصوة فى عنيه

يقول كفاية كدة عليه

وكفاية كده علينا العلل

:الحالم

يمكن يجوز ..شيء مش بعيد

يتولد ما بنا الولــيد

يكسر بسيفه الحديد

كل سيف خشب أتعمل

يمكن يجوز ..أو محتمل

:العالم

شيء لا ممكن..دا مستحيل

من غير شموس هنعيش فى ليل

سيبكوا من الأمل الطويل

بالثورة الميل يتعدل

يمكن يجوز ..أو محتمل

:الفاهم

يمكن يجوز ألف أحتمال

وسباحة فى بحر الخيال

هى البلد عايزة رجال

ولا عايزة رصة قـلل

يمكن يجوز..ومحتمل

حالة حداد

تعلن مدونة قلم الحرية عن بدأ حدادها والذى يستمر لمدة يوم ثلاثة أيام ( 9 /10 /11 مارس ) وذلك بمناسبة الذكرى الـ 59 لأحتلال قرية أم الرشراش ( إيلات ) وندعو جميع المدونين للتضامن معنا ومشاركتنا فى حدادنا..نصرنا الله وإياكم

أنه حقا عالم هايف

كنت قاعد فى أمان الله على سلم كليتنا الحبيبة ساعة ما قربت منى صديقة عزيزة والغضب مالى عينها..جت عليا وطلبت منى طلب غريب حبتين ، قال أيه؟؟ عندها موضوع مهم عايزانى اكتب فيه قصيدة ...ورغم انى ضد مبدأ الكتابة بالطلب وبقر مبدأ ان الشاعر يكتب اللى يحسه بس مش حاجة تانية إلا انى كملت كلامي معاها من باب الفضول وسألتها :موضوع أيه ده؟؟

عايزاك تكتب على هيافة الشعب المصرى-

هيافة الشعب المصرى !!...بس شعبنا مش هايف -

أمال تسمى اللى حصل فى المحاضرة ده أية؟؟-

من غير ما أعرف اللى حصل..ممكن تكون فيه مظاهر سطحية وهيافة عند البعض -

بس ده مش معناه اننا نهيف الشعب كله

خلاص...اكتب على مظاهر الهيافة دي -

ورغم نيتى المبيتة انى اكبر دماغى ومكتبش حاجة إلا انى الفكرة استفزتنى وكتبت القصيدة التالية واللى بنتها فى الاساس على نكتة قديمة معروفة..يارب تعجبكم

وأنا ماشى حسيت بالخنقة

حودت لى على أقرب قهوة

أخد شاي ويا حليب

بس الدنيا قِسم ونصيب

بدل اللبن ويا الشاي

خدت لي يابنى حتة درس

قبل ما تسأل ليه و أزاي؟؟

أسمع منى..دا ينفع ورث

واحد هايف جه يستهيف

ميل على ودن إنسان أهيف

تسمع منى النكتة الهايفة -

لأ دي قديمة -

ولا ليها لازمة ..ولا ليها قيمة

كل الناس للنكتة دي عارفة

بس هايفتى دي حاجة ع الموضة -

يادي الداهية الكحلى السودة -

نكت يالا..أتفضل قول

راح الهايف قال على طول

مرة الواد الحيلة النيلة

راح لأبوه أبو خيبة تقيلة

قاله بابا أنا مش مبسوط

عمرى فى يوم ما بأكون مظبوط

ولا شخصية..ولا أرادة

دنيتى سادة..زى زيادة

فرحي وزعلى أصبحوا عادة

عايش كما جاموسة ولادة

ولا حصان بلجام مربوط

رد الأب بكل تسؤال

يعنى عايزنى أعمل لك أيه؟؟

أقلب أسمك أخليه وائل

ولا أشترى لقب البيه

عايز حاجة تبقى لى ميزة-

أمشى ويا البنت عزيزة -

حاجة أتشرف بيها فى الحتة -

روح الجيم ..ربى الجتة -

بابا أفهمنى -

عايز حاجة تعيش على طول

يبقى اكيد خط المحمول -

يادي الحوسة -

أنت فى وادى و أنا فى وادي

حاسس أنى فى مالطة بنادي

علشان نازل لت وعجن -

وكلامك مليان حوارات

عامل زى أهل الفن

عمال تودينى فى متاهات

قول بصراحة عايز أية؟؟ -

ولا تكنش مني انا خايف

ابداً ابداً... وها أخاف ليه؟؟ -

عايز أبقى إنسان هايف

تقدر بابا فى ظرف يومين

تعلمنى أي هايفة

ويومين ليه ؟؟دا فى غمضة عين -

بس أنسى لى أى ثقافة

خلى فى مخك موز وكنافة

أشرب بانجو ..حشيش ..وهباب

وأياك تمسك أى كتاب

عيش فى الضلمة ليالى طوال

ولا تفتحش باب النور

وبدل غنوة الأطلال

شغل ميلودى ع الحنطور

off ماتبقاش on خليك

لما تكون ع الأنترنت

وأنكر يابنى أنك راجل

قول على نفسك أجمل ست

ولا تنساش الجيل فى شعرك

وكمان حط لبانة فى بقك

خلى كلامك كده ع الهامش

بيع الكل وأشترى نفسك

خليك سطحى وأنسى المصدر

وتعالى فى الهايفة و أتصدر

شكراً بابا على دي نصيحة -

المنظر lookوأهو كدة برضة الـ

خليت عقلى فى حالة مريحة

بسيجارة واحدة خلاص أتخدر

******

خلصت نكتة جوز الخيل

ويارب م الضحك يموتوا

و أنا عن نفسي شفت الويل

من أبو وائل ومن جبروته

بس الحالة دي ما دامتش

بصة يمين ..بصة شمال

قلت نفسى ما تعيطش

ماهو دا برضة واقع الحال

واحد قضى حياتة محاولة

علشان يكسب عشرة طاولة

أما جارنا صنايعي الدوكو

نزل أحدث نغمة ولوجو

حتى القهوة اللي أنا فيها

حرقت دمي وكل ما فيا

كلمة " مقهى " اللي عليها

فجأة قلبوها لـ " كافتريا "؟

نسيوا العربى..نسيوا المصرى

عاشوا عشان العرض الحصرى

عاشوا يحيوا الفن الهايف

نسيوا أباظة وزينات والقصرى

سبت الشاي بحليبه وقمت

روحت أدارى في اى مكان

وأسأل نفسى أصل أنا تهت

هو أنا هايف..ولا إنسان

وعلشان أرسى بسرعة كتبت

بالطباشيرة على الجدران

"

حكمة عظيمة ..لأهل السيما

لأهل الفن..لأهل الكورة

حكمة لأبو هيافة قديمة

وأبو هيافة جديدة فى الصورة

حكمة لقاتل من مقتول

حكمة بسيطة جاية تقول

ياللي ع المستقبل خايف

أنه حقاً عالم هايف

"

أسف للأطالة

خطاب تولى الرئاسة

تولى الرئيس ( جيمى ) رئاسة جمهورية ( إيجبتستان ) بعد أنتخابات نزيه وتأييد جماهيرى تام وكان هذا هو أول خطاب يلقيه بمناسبة العهد الجديد

إلى شعبى الطيب الأحمق

الناظر تحت أقدامه

اليوم توليت السلطة

سلطان وأنتم خدامه

سلطان واحد متفرد

لا يوجد خلفه ولا أمامه

سلطان جبار أسود

الظالم حتى فى أحلامه

فالطاعة..الطاعة يرغب

فالحكم فى أول أعوامه

فالطاعة و( نعم )أبدية

وتأييداً حاراً لمقامه

والكلمة منه مسموعه

والصقفة من بعد كلامه

بالروح والدم تفدونه

فى كل حروبه وسلامه

إن خان الأخوة فخونهم

فالمرئ على دين إمامه

وإن باع الأرض فبعوها

فما جدوى الأرض فى أيامه

وإن سجن الأهل فأنسوهم

فالسجن من أولى مهامه

هذا قانونى ودستورى

ويقول خطابى فى ختامه

اللعنة على شعباً أخرس

باع الحرية بطعامه

للخطاب بقية

يا كوستنا

ياولاد بلدنا المحروسة

الموكوسة

محسبكوا جى يبيع كوسة

وشوية قرع

*************

كوستنا كوسة ممتازة

وقت العازة

تجيب وظيفة وجوازة

وفتاوى الشرع

*************

كوستنا درجتها الأولى

كوسة عمولة

بتنهى وتجيب الفولة

من قبل الزرع

*************

كوستنا م الباشا والبيه

حتة كارنية

يطلع فى وش ولاد الأيه

أحسن مطلع

************

بالكوسة تفرح تتهنى

أخرة و دنيا

يمكن كمان تدخل جنة

وفى أحسن فرع