حوارات....1
وكيل النيابه: أحنا هنحبسك أربع أيام على ذمه التحقيق
المواطن: بس أنا برىء.....أنا ما عملتش حاجه
وكيل النيابه: وأنت ايش عرفك؟؟
المواطن: أمال مين اللى هيعرف؟؟
وكيل النيابه: أحنا....أحنا نعرفك أكتر من نفسك
المواطن: أزاى بقى ؟؟
وكيل النيابه: أنت تعرف ضغطك كام دلوقت؟؟قلبك بينبض كام نبضه فى الدقيقه؟؟بتطلع كام لتر عرق فى اليوم؟؟ العلاوة اللى أنت مستنيها
هتجى ولا لآ؟؟؟ تعرف حاجه من ده كله؟
المواطن: أبداً
وكيل النيابه: أحنا بقى نعرف,لأ وأيه!!..نقدر نزود لك ضغطك ونوقف قلبك ونشف عرقك ونمنع عنك العلاوة,يبقى نعرفك أكترمن نفسك ولا لأ
المواطن: فعلاُ....بس مادام الموضوع كده,تسمح تقولى أيه تهمتى؟؟
وكيل النيابه: لسه معرفش بس التحقيق شغال وأكيد هنوصل لحاجه
المواطن: بس أنا ما عملتش حاجه
وكيل النيابه: أمال جابوك هنا ليه؟؟
المواطن: معرفش...ثم كمان القانون بيقول المتهم برىء حتى تثبت أدانته,وما دام مفيش أدانه من أصله يبقى أخد أفراج مش اربع تيام حبس
وكيل النيابه: عايز تقول أن أحنا شاغلين غلط
المواطن: أنا ما قلتش كده
وكيل النيابه: بنرمى الناس بالباطل
المواطن: يا أفندم أنا ما أقصدش
وكيل النيابه: عالم مفتريه أحنا
المواطن: أنشك فى لسانى لو كان ده قصدى
وكيل النيابه: خلاص يا أستاذ...كلامك فيه التهمه والدليل,وكله متسجل صوت وصورة...شكراُ لأنك أعترفت..أحنا كنا عارفين أنك مش هتضيع تعبنا هدر.............يحبس 15 يوم على ذمه التحقيق ويراعى التجديد فى الميعاد...اللى بعده
المتهم:؟؟؟؟؟؟؟؟؟؟
هناك تعليقان (2):
صحيح معاه حق وكيل الأمن العام ... مش وكيل النائب العام ... اكيد انت اللي غلطان في حوارك دا ... الا اذا كنت بتنقل المشهد ومش قاصد الغمز واللمز ... يعني كميرا مان ... .. يا صديقي كل شيء تسرب اليه الفساد .. كل شيء اصبح طعمه مر ... وكما قال مظفر النواب .. هذي الامة لابد لها ان تأخذ درس في التخريب
أنا فعلاً مش قاصد الغمز واللمز ،ومفيش أى سابق معرفة بينى وبين سيادة وكيل الأمن العام..كما أنه لاتربطنى أى علاقة بهذا المواطن ،ولا أدرى كيف استطاع ان يتسلل بهذا المشهد إلى خيالى وأوراقى دون علمى..إن فى هذا أعتداء واضح على حقوقى الفكرية..وهى تهمة أرجو أن يضيفها سيادة وكيل الأمن العام إلى مجموعة التهم لديه
وعلى رأى دانا(أى خدمة ياباشا)؟
إرسال تعليق