بصراحة
من غير أدب
من غير كسوف
ضمايرنا شلناها فى علب
على الرفوف
وميزان العدل أتقلب
وتعالى شوف
ميزان جديد أهو أتنصب
وسط الميدان
أروع ميزان
له مكيالين
و 3 كفوف
مكيال مبحبح للكبار
مكيال محندق للصغار
وده مش هزار
دى سياسة عليا مُحكمة
هتحل أصعب مشكلة
وتجاوب أى مسائلة
وتعدينا لبر الأمان
محلى الميزان
محلى الميزان ومحلى أللى بيوزنوا
لو يفهموا
لو يسمعوا
ولا نيام
دا القلب دايب م البكا
وألف مليون مرة أشتكى
وأنتوا نيام
القلب لسه بيشتكى
دى مصيبتى قصة بتنحكى
برضة نيام
كسرت جدران السكوت
وشكيت ياقلبى بأعلى صوت
دول ناس نيام
عملين نيام
وأنتوا عيونكم مفنجلة
ولا فى خشا ولا فى حيا
ولا فى أدب ولا كسوف
ضمايركوا شلتوها فى علب
على الرفوف
***************
بكرة الميزان يصبح صنم
وفينا أللى هيعبده
ويوحده
ويمجده
يبقى مفيش غيره ميزان
دا العدل أللى هنعرفه
وغيره ضلال
غيره محال
غيره محال يوم يتنصب
دا ميزان ضعيف
ورقة شجر
فى عز أيام الخريف
أما ميزانهم شئ بديع
شئ فظيع
عملاق مخيف
أقوى من شجر الربيع
فى الأرض ثابت بالجدور
وأقوى من برد الصقيع
فى القلب ساكن فى الصدور
محتاج دوا
لأ...معجزة
وأحنا الشعوب النامية
النائمة
العاجزة
ربونا ما نشوفش الميزان
ولو نشوف
نعمى عيونا بالهباب
نغرس دماغنا فى التراب
يركبنا خوف
وإن حد فينا فى يوم وقع
فى بير غويط ملهوش قرار
يجى الكبار داقين دفوف
عملين له زار
ينعوه بكلمة وملمين
طب كنتوا فين؟؟؟
طب كنت فين يا أبو العرب
عمال تطوف؟؟؟
وسايب ضميرك فى العلب
على الرفوف
****************
بكرة الميزان يصبح شعار
يملا الجرايد والكتب
يصبح تاريخ
فرعون وأسمه ميزان حتب
بكرة نبنى له الهرم
ونحطه على راس الأمم
وفى عيده العدل ينعدم
لكن زمان
كان الميزان
زى الكابوس ملهوش كيان
بكرة الميزان يصبح علم
بكرة الميزان يصبح علم
هناك 5 تعليقات:
رائعه يا محمد
كانها قصه وحكايه
مش اغنيه جميله
روعة بجد وبتضمن معاني بتجسد لك الواقع بجد أكنك بتتفرج على مواقف قدامك
ربنا يوفقك
تقبل تحياتي
متشكر جداً ياجماعه على رأيكم ده وأنتظروا المزيد
بجد راااااائعة
حضرتك فعلا شاعر متميز جدا وراقى
وشعرك له معانى احنا محتاجينها بشدة
حاول تعمل انتشار اكتر من كدة وسط المدونات والمنتديات
اكيد بكلماتك هتقدر تغير فى افكار الناس ان شاء الله
وربنا يوفقك يارب وينفع بيك
متشكر جداً ياشيماء على رايك الجميل ده
،موضوع الأنتشار ده مش بأيدينا..والواحد بيعمل اللى ربنا يقدره عليه
شكراً مرة تانيه لتلبيه الدعوة
إرسال تعليق