أليكم تدوينة العيد..عارف أنها متاخرة لأنها كانت المفروض تنزل قبل العيد بكام يوم بس معلش..مشاغل والله..وكل سنة وانتم طيبين..واحرار
العيد فـرحة...لأ تفاريح
بسـمـة لـــكل الهم تزيح
أجري يا سوسن هاتى بلونة
وأنت يا عمرو أركب مراجيح
العيد فرحة ...لأ تفاريح
************
العيد طرحة لفستان فرحة
دنيا عروسة وأنت عريسها
العيد نظرة فى عيون سارحة
حلم البنت تلاقي فارسها
حلم البنت أم فيونكات
دنيا جميلة..تبات ونبات
ويجيلها بطل الحكايات
يخطفها على بساط الريح
العيد فرحة..لأ تفاريح
***************
العيد فرحة..يعنى عيدية
يعنى الجيب يبقى له قيمة
يعنى اتفسح فسخة قوية
انا وصحابى نخش السيما
انا وصحابى نغنى ونحلم
خطوينا ع الأرض تعلم
العيد فرحة ..لية نتألم؟؟
لية لسه ما بنا مجاريح
دا العيد فرحة ..لأ تفاريح
**********
العيد فرحة..مأمأماااء
أكلة سمينة ولبس جديد
م الفجرية ووسط خلاء
سوا بنصلى صلاة العيد
عيد ورا عيد..أيامنا بتجري
ننده :حاسب..أهدى وهدى
لسه الدنيا ليها لون وردى
لسه الكون قدامنا فسيح
العيد فرحة..لأ تفاريح
هناك 4 تعليقات:
كل عام وأنت بخير وما أجمل قصيدتك
جميله اوى يامحمد
بس جديد عليا شعر المناسبات دا
وكل سنه وانت طيب مع انها متأخره زى قصيدتك
عصفور المدينة
وأنت بخير وصحة وسلامة وسعاده
كم تسعدنى زيارتك ياصديقى
emmy
أهلاً بيك فى أول زيارة ليك فى مدونتى المتواضعة..وأرجو أنها ماتكنش الأخيرة
وكل سنة وانت طيبة مع انها متاخرة زى زى تعيدتك عليا المتاخرة..زى زيارتك المتاخرة..زى القصيدة المتاخرة..زى.....
يوووووووووووه..مفيش حاجة بتجيى فى معادها
إرسال تعليق