لقرأة التحقيق 1 ( نص التحقيقات الرسمية بأستخدام الأشارات البدائية ) أدخل على الأرشيف شهر نوفمبر 2007 بوست التحقيق
يعتبر التحقيق 1 الجزء الأول من هذا البوست
ديموقراطية التعذيب
إلى عزيزنا المتهم
بكل تهمة عندنا
نظرا لأنك من الوطن
ووطنا أمره يهمنا
عملاً بمبدأ المشورة
ورعاية حق البشر
وأتفاقيات العروبة
للأشتغال المفتخر
وتوجيهات الزعيم
وولى عهده المنتظر
بنخيرك
ونحيرك
وبنسألك من قلبنا
سؤال بسيط لكنه هام
من غيره هيطول الكلام
من غيره هتتعبنا معاك
ونجيب أبوك
ونجيب حماك
يمكن كمان تيجى المدام
سؤال بسيط لكنه صعب
ولا طالبة خوف
ولا طالبة رعب
ولا طالبة لف ودوران
ونقول ماكنش
تقول دا كان
دى البندقية ليها كعب
......
دى البندقية ليها كعب
وليها بوز
والنرفزة شيء محتمل
وشيء يجوز
فجاوب سؤالنا بأختصار
وبلاش تعمل فيها حمار
لالدنيا تبقى ضرب نار
ولونها كحلى بعد روز
أما سؤالنا المحترم
اللى الكلام والعين عليه
فهو عزيزنا المتهم
تحب تتعذب بأية؟
عندنا كل شيء متاح
وشتى أنواع السلاح
لو كنت طير ولك جناح
وسألت أمتى ؟ أزاى ؟ وليه ؟
هنقص ريشك ريشة ريشة
وتبقى مسخة
وتبقى خيشة
وكل يوم تصبح تقول
ملعون دي ابوها عيشة
أما لو كنت نبيه
وقلت اللى نقولك عليه
ومضيت أعترافك من سكات
من غير ما تقرا اللى فيه
تبقى حبيبنا ومننا
و أبن الوطن
يعنى أبننا
واحنا قلنا م البداية
وطنا أمره يهمنا
هناك 6 تعليقات:
أنا متأخر فعلا أنا آسف بس والله رائعة وقريتها 3 مرات
عصفور المدينة
الله يكرمك ...كنت بدأت أحس أنها وحشة ومش هتعجب حد
أنا قريتها من مدة وعجبتنى جدااااا والله.. بس كنت مستنية اقرا الجزئ الاول وبعدين أرد..
بس لما رحت اشوف التحقيق الأول لقيت وقفة حداد ..حسيت مدونتك عايزة يوم كامل تتقرى من أولها..
بجد ما شاء الله كتاباتك اكتر من رائعة .. الأحلى انها بتكلم كل الناس مفيش حد هيقراها وميفهمهاش..
أمتى كان حلمى جريمة
ولا أثم من الأثام
ح:حقيقة..الحلم ذنب-
الأحلام أصلاً حرام
أيوة فعلا الحلم بئة حرام حتى من غير محاولة لتحقيقه..:(
أسلوب جميل جداا فى التعبير ويمكن بيوصل للناس أسهل كتير ما بتوصل المقالات ..
فى انتظائ مزيد من ابداعاتك
شكرا على كلامك الجميل ده
واللى اسعدنى جدا
ويارب اكون دايما عند حسن ظنك
ماشاء الله كلمات بسيطة ومعنى قوى .
سمية
سمية
شكراً على رأيك وأتمنى لو كنت مدونة انى اعرف مدونتك عشان ارد الزيارة
ولا مكنتيش فان شاء الله تنضمى قريبا للمدونين
ويارب ما تكنش اخر مرة نشوف تعليقك فيها
إرسال تعليق