قلم الحريه

19‏/9‏/2010

الووووووو يامصر

جارى اتصال
وأول ما خطك ينفتح
هانده وأقول الووووووووو يا مصر
لحد صوتي ما يتنبح
سمعانى ولا الصوت مقطع
ولا ضايع في الفضا
ابنك غريب
والغربة اصعب من القضا
مع انى مش طالب غنا
ولا جاه وعز وهيلمان
دا انا بس طالب الرضا
...
سمعك قوي
لو تندهي او تهمسي
ما انا مش بعيد
دا انا اللى شايلك جوة منه
جريان في انهار الوريد
ما تردي قبل مانفترق
وقبل قلبي ماينحرق
مع جملة " نفاذ الرصيد "
***********
الوووووووو يامصر
كان في مابنا اتصال
لية انقطع
كان فية مابنا زمان وصال
بقى مصطنع
كان فية ما بنا عهود كتير
من فينا صان
من فينا خان
من انخدع
طب كان زمان حضنك وسيع
وكنت فيه طفلك رضيع
دلوقت حاسس انتزاع
من قلب حضنك منتزع
كان في زمان شمسك صباح
كان فيه زمان قلبك براح
دلوقت قلبك صابه كسر
دلوقت جارى الاتصال
والرد انك " غير متاح "
فينك يامصر

9‏/1‏/2010

عن المعدومين بالذات

على أسم مصر التاريخ
يقدر يقول حكايات
أيشى عن فراعنة
وعن سلاطين أموات
لكن النهاردة
وعلى أسم مصر انا بكتب
عن اللى تحت
ع المعدومين بالذات
***********
إزاى تعيش يومك
يالىى ماتملكش
كل الحاجات عايزة
وأنت ماعندكش
أية تشتري البسمة
لو حانت الأزمة
غير كسرة الخاطر
وضربة الجزمة
وخيبة العشمان
في الأخوة والأخوات
جي النهاردة أكتب
ع المعدومين بالذات
*******
إزاى تفتح عنيك
وأنت عليك ذلة
ياللى فوقيك كرباج
ملهوش ولا ملة
ياللى حاسس أوجاع
كل مافيك متباع
والسعر متقسم
مابين ألم وضياع
ودمعتين وآهات
حي النهاردة أبكي
ع المعدومين بالذات
*********
إزاى تحس العشق
وأنت بجناح مكسور
إزاى يابن السجن
تقدر تعدي السور
الحب لو موجود
مايعش وسط حدود
الحب زي الطير
مايعش عيشة الدود
في الزحف والخطوات
جي النهاردة أنعي
المعدومين بالذات
*********
على أسم مصر التاريخ
يرمي القلم .. يسكت
أسف ياعم صلاح
لكن الزمن ينقط
عيشة بلا معنى
ولاححد يسمعنا
مش بعترض لكن
تنفيس لأوجاعنا
وقبل الممات كلمات
جي النهاردة ألقى
المعدومين بالذات
#####

23‏/7‏/2009

أيوة .. هأسافر

ناوي أهاجر
أيوة .. هأسافر
أيوة هأسيب الدنيا بحالها
وأركب موج البحر وأعافر
يمكن أنجح
يمكن أفشل
يمكن أفهم اللى بيحصل
يمكن أخرج م الدوامة
وأصرخ فيهم أنا مش تنبل
أنا مش قاصر
أيوة هأسافر

****
يمكن لما أعدي البحر
وأوصل يوم ع البر التاني
ألقى نصيبي وحظي هناك
واقف صابر يستناني
وألقى في أيده شنطة كبيرة
فيها ملامحي وفيها عنواني
...
يمكن ألقى الحظ دا أسود
يسرق مني لحمي ودمي
وألقى لسانه بيشتم أبويا
ولا بيطعن في شرف أمي
أصرخ أدافع
يأمر .. أخرس
أخرس لكن غصبن عني
وألقاه يملك كل مافيا
حتى لساني
وألقي نفسي خدمة رخيصة
حاجة ع الهامش
وأسمع صوت بيأنب فيا
ما أنت في بلدك مرتاح عايش
لية بتعدي موج البحر
ينزل دمعي يفتت صخر
وأنطق جملة قديمة عقيمة
لكن فيها حكمة عمر
أنطق أقوله
الجوع كافر
أيوة مسافر

21‏/5‏/2009

منمنمات تارخية 3

أسف على التاخير المدة دي كلها ، بس هي ظروف صعبة بجد .. دلوقت جه معادنا مع الأغنية رقم 3 والأخيرة من أغاني عرض " منمنمات تارخية " وهي بلغة المسرح أغنية فينال ، يعني أغنية بننهي بيها العرض .. يارب تعجبكم

علي سورك يا قلعة

علي سورك يا قلعة .. خليك يا شمس طالعة

وأنت يانيران غضبنا.. عايزينك لسه والعة

مش عايزين الحكاية .. اللى تحكم بموتنا

مش راضين بالنهاية .. اللى تطلب سكوتنا

لازم يشتد عودنا .. لازم نربط خيوطنا

قبل مايحل موتنا .. لازم تبقى لنا رجعة

علي سورك يا قلعة

مش عايزين الشتات .. مش عايزينك يافرقة

مش عايزين الممات .. ويا البكا بحرقة

اه راضين نتعل ونشقى .. لكن بشرفنا نبقى

دا لانصر بيجي سرقة.. ولا حق تجيبه دمعة

على سورك يا قلعة

موعودنا بعد الامتحانات ان شاء الله

27‏/3‏/2009

منمنمات تاريخية 2

الأمام التاذلي : من أهم شخصيات العرض المسرحي منمنمات تاريخية ، نموذج مثالى لما هو مفترض أن يكون عليه عالم الدين ، لا يسكت على الباطل، ولا يتخاذل عن الواجب ، ولا يكتم الشهادة .. تكشف له أحداث المسرحية حقيقة سلطانه وحقيقة زملائه من علماء الدين ، حيث يجد أنالقاعدة الأولى في دمشق هي " نفسي .. نفسي " وان لا أحد يفكر في الأمة الأسلامية ولا في المحتل القادم ولا في الشعب البسيط إلا القلة .. وهنا يصعد على سور القلعة ليلقى خطبة عصماء - مونولوج اكثر من رائع -يستخدم فيه صفته كرجل دين ويقوم بعزل السلطان وأتابعه من فاسدي العلم والتجارة ، ويخبر الناس ان من تسبب في نكستهم هم أنفسهم
" فلو كنا على غير مانحن فيه لكان لنا سلطان غير هذا "
ثم يطلب من الحاضرين طلب يثير دهشتهم واحترامهم في نفس الوقت ، يطلب منهم أن يقفوا خلفه ليصلوا صلاة الغائب عليه !! يصلى على نفسه وهو حي ليؤكد للجميع انه يقبل الموت في المعركة ولا يخشى احد سوى الله ، وبالفعل يبدأ في الصلاة وهم من خلفه .. وهنا تبدأ الأغنية الثانية التى نعرف بعدها مباشرة أنه أستشهد في الحرب

أغنية الأمام التاذلى

نور الفانوس أنطفى
بدر البدور أختفى
وياليل مالوش اخر
دا من الحياة أكتفى
********
صلى على نفسه
وخلاص عقد عزمه
يكتب لنا بدمه
أصدق عهود الوفا
نور الفانوس أنطفى
*********
نور الفانوس دا بيان
يكشف لنا السلطان
دا السلم مش خذلان
والحرب مش فلسفة
نور الفانوس أنطفى

16‏/3‏/2009

منمنمات تاريخيه 1

أ . محمد عبدالقادر
صديق عزيز على قلبى وأنسان أتعلمت منه كتير ولسه بتعلم ، شرفُت بالشغل معاه السنة اللى فاتت في مسرحية المهاجر اللى اشتركت بيها كليتى في مسابقة الجامعة ، وشرفت السنة دي كمان بالشغل معاه رغم أنه كان بيخرج لتجارة ، بس انا كنت شغال معاه بقلمى ، كنت بكتب له أغانى مسرحيته الجميلة ( منمنمات تاريخية ) أخراجه وتأليف سعدالله ونوس
وهي مسرحية بتدومر حول مرحلة هجوم التتار على مدينة دمشق .. وانا كتبت لها 4 اغنيات ، اتنفذ منها 3 هنشرهم على البلوج تباعاً إن شاء الله .. ودي أول قصيدة وهى مقدمة المسرحية

المقدمة

حي .. حي .. الله حي
أيام ضلمة مفيهاش ضي
أيام شايخة .. بجنون صارخة
مليون أهه .. ومليون أى
حي .. حي .. الله حي
**********
الحكاية مش جديدة .. الحكاية هي هي
جوه أزمانا البعيدة .. تلقى نفس الكلمة ديا
دنيا ماشية في قلب دايرة .. والزمن زي الرحايا
والحكاية بينا سايرة .. م البداية للنهاية
والنهاية مش غريبة .. مش بعيدة عن عينينا
والبداية دي قريبة .. من حياتنا وم اللى فينا
بس احنا اللى نسينا .. اصبح النسيان فريضة
الحكاية هي هي .. الحكاية مش جديدة
***********
حي .. حي .. الله حي
أيام ضلمة مفيهاش ضي
أيام شايخة .. بجنون صارخة
مليون أهه .. ومليون أى
حي .. حي .. الله حي

6‏/1‏/2009

تضيعي منا ياغزة

مابين خاين
وبين سفاح
وبين حاكم عايش اخرس
وبين والي عايش مرتاح
تضيعي منا ياغزة
بلا مغزى
بلا أحساس
بلا هزة
في شعر الراس
بلا معنى
لأوجعنا
ويسمعنا يهود أنجاس
يزيدوا الضرب في اهلك
يزيدوا الحرق في أرضك
يزيدوا الجرح في قلبك
وقلبك ماس
لا بيهادن ولا يسلم
واقف وحده يتألم
ويسأل امتى نتكلم
وأمتى نرفع الراية
تلاقي الراية مرفوعة
لكن بيضا
ودي نهاية
وأي بطولة عربية
ماهش اكتر من أغنية
ونكتة قديمة
ورواية
وراية الحق منداسة
وتحتيها شرفنا أنداس
تضيعي منا ياغزة
بلا مغزي
بلا هزة في شعر الراس